الفرح بكرة
يوم1999/4/9اليوم ده عمره ماهيروح من ذاكرتي ابدالييييييييييييييييييييييييييييييييييييييه ؟
تعالوا مع بعض نعرف ليه
القصة بتبدأ لما انا خلصت مركز التدريب في الجيش ودي كانت مرحلة اصعب من الولادة في الشهر السابع . المهم اني كنت مترحل ومعايا الف عسكري مؤهلات عليا زي حالاتي, المهم انهم قالولنا اننا هنقعد علي محطة القطر حوالي سبع ساعات في انتظار القطر الحربي علشان نروح المعسكر اللي هنروح منه علي الوحدات الأساسيةاللي هنقضي فيها باقي فترة التجنيد. المهم اني قدرت بمعجزة اني اقولهم في البيت علي ميعاد وجودنا في المحطة. وفي الميعاد المظبوط جاني والدي رحمة الله عليه ومعاه اعز اصدقائي أحمد وفرحت بيهم فرحة جامدة جدا خاصة انهم جابولي معاهم فرخة مشوية اه والله العظيم مشوية.ما تستغربوش فرخة مشوية مع واحد بياكل اكل ميري بتعمل عمايل جامدة جدا.بعد ساعة استأذن والدي علشان كان تعبان وفي نفس الوقت علشان يسيبني انا واحمد نتكلم براحتنا.احمد كان في عينيه نظرة كانت مضايقاني جدا لأنه كان بيبصلي بحسرة وكأني خروف رايح يدبح بعد صلاة العيد.قعدت اهزر معاه وأقوله يابوحميد الجيش للجدعان وكلنا لها وانا الحمد لله مرتاح وخلاص الفترة الصعبة عدت ودة راسه والف جزمة قديمة مايضحك ابدا.المهم ياسادة يا كرام أخونا أحمد فضلت عقدت لسانه في حالة رفض تام انها تتفك لغاية ما سمعنا صوت القطر جاي من بعيد وهنا تكلمت شهرزاد قصدي تكلم احمد صديقي وقال كل اللي في نفسه ودار الحوار التالي.
انا/ايه يا ابو حميد وحد الله
/يأخذ نفس عميق قائلا لا اله الا الله
انا/مالك يا أحمد فيه ايه
هو/ مافيش حاجة انا كويس الحمد لله
انا/ يا احمد مافيش وقت القطر وصل وقدامنا عشر دقايق بالكتير وانت قلقتني
هو/اصل بصراحة
انا /يا عم قول خنقتني
هو/اصلي معزوم علي فرح بكرة
انا/وحياة امك كل دة عشان معزوم علي فرح
هو/ اصلي مش عارف اروح ولا لأ
انا/ ليه الحيرة دي عايز تروح روح مش عايز خلاص
هو/ اصل انت مش عارف دة فرح مين
انا/هايكون فرح مين يعني
هو/ فرح فلانة
ملحوظة هامة جدا***فلانة دي تبقي الانسانة اللي انا بحبها
انا/بجد
هو/اه والله
انا/متقمصا دور الفرسان**لازم تروح يا احمد لازم تقف جنبها
هو/انا كنت مستعد لليوم من زمان بس تكون انت العريس
انا/الحمد لله علي كل حال وماتنساش تقولها الف مبروك عن لساني
هو/ حاضر
يأتي القطر ونبدأ في الرحيل وأنا لا أري شيئا امامي وكل اللي داير في دماغي سؤال واحد( ياه بالسرعة دي) وركبت القطر وتوهت في الزحمة وجاني الوحي وكتبت اغنية قعدت طول فترة الجيش كل ما اقعد لوحدي اغنيها ويمكن لحد وقت قريب كنت بغنيها اما ايه هي الأغنية.اللي هيقرا البوست القادم ان شاء الله هايعرف
هناك ٦ تعليقات:
أوعي يكون صاحبك ده اللي أتجوزها ؟؟؟؟
صديقي الجميل بحبها
انت عارف البوست بتاعك دة فكرني بايام الجيش وفعلا احساس اصدقائك والبيت وهما بيبصولك وكأنك رايح السجن مش رايح تتجند وتلاقي نظرات شفقة كدة فعنيهم غير صحابك اللي وخدين عليك ويقلولك خلي بالك من زيت الكافور وكل واحد بكلمة وبصراحة عهم حق احنا بنقى رايحي للمجهول
اقول على حاجة كلامك الجميل والمباشر دة فكرنى بيها
وانا فمركز التدريب قعدنا 60 يوم ومترحلناش على وحدتنا لأن كنت من المجموعة اللي خدت فرقة صاعقة
المهم في اواخر الستين يوم كنا خارجين من المركز وريحين نضرب نار وانا اصحابي بتوع الجيش خرجين واحد منا شاف عربية كرو وجراها جمارة مش قادر اقلك على العماليل اللي عملها موتنا كلنا ضحك وكمية تعليقات ما ينفعشي اقلها دلوقتي بس اية كانت مسخرة وانتهي الموضوع بانه خد يومين حبس
ارجع تاني للجزء الاخير في البوست بتاعك وفكرة الوداع او بمعني ادق كلمة النصيب وما تحملة تلك الكلمة من معاني كثيرة انا فعلا تعرضت لشئ مشابه لكدة بس معايا عدي على خير
انت عارف
احساس وانت قاعد في القطر انا عارفة كويس
انت كنت قاعد ومواقف كتير عمالية تيجي قدام عنيك بادق تفاصيلها كأنه شريط سنيما بيتعرض قدامك في الاخر لما تفوق متلقيش نفسك غير لوحدة ومعاك شويت دموع ممكن ما تكنشي على خدك لكن اكيد موجودة علي قلبك احساس فعلا صعب
الواحد لو عندة فلوس فالبنك وعقارات من الاخر يعني من الطبقة اللي الفلوس عندها اخر حاجة تفكر فيها
يمكن كان في مواقف كتير فحياتنا محصلتش
لكن الحمد لله على كل شئ
انت فكرتني بذكريات فيها الحلو والوحش بس بجد انا سعيد بمعرفتك واتمنى دوام التواصل باذن الله ومستني مش قادر اقولك قد اية بقيت البوست بتاعك
حتى يأتي موعد قرأتي الجديدة على مدونتك الجميلة اتركك في رعاية الله وامنة
صديقك
صاحب المكسرات
ياااااااااااااه
بوست يوجع اوى
ورد الفعل كمان عليه وجعنى لانى حسيت قد ايه كان الوجع وقتها
بس اقولك يمكن الاهون فى الموضوع ده انو مكنش قدام عنيك
تخيل احساس حد بيحب حد ويفضل شايفه قدامة مع حد تانى بيحبو ويتجوزو كمان تخيل يخلفو كمان وبرضو هو لسه بيتفرج بس برضو بيمنى له السعادة من قلبة
بوست حلو
والمدونة كمان جميلة
وشكرا على مرورك ودعوتك
تحياتى
عزيزي مكسوفة
انتي بتركزي علي حاجات غريبة قوي. هو فعلا الفرق كبير لو كان صاحبي هو العريس لأني ساعتها كنت هاقولهم الكلمة الشهيرة اللي انتي معلقة عليها وهي
طز فيكما
طز فيكما
طز فيكما
عزيزي الجميل صاحب المكسرات
أهي ذكريات بتفضل عايشة جوانا وكل شوية بتتقلب جوانا وبتقلب علينا المواجع.وعلي فكرة موضوع ان انت مستني باقي البوست خلاني اخاف احسن ظنك مايطلعش في محله والاغنية ماتعجبكش.
ربنا يستر
نورتني وشجعتني علي الاستمرار
سهر الليالي
والله انا سعيد جدا بالمرور الجميل والتعليق الجميل وسعيد أكتر اني لاقيت ناس تحس معايا نفس الاحساس يعني فيه مشاركة. لكن موضوع انو احسن ان انا بعيد مش عارف اذا كان دة صحيح ولا لأ
نورتيني واتمني دوام التواصل
إرسال تعليق