الأحد، ١٧ فبراير ٢٠٠٨

طباخ الريس

طباخ الريس اتفرج علي الفيلم وادعي للريس اثناء مشاهدة فيلم طباح الريس لاقيت نفسي علي وشك البكاء علي حال رئيس الجمهورية(لا حول ولا قوة الا بالله)
الراجل طول الفيلم بياكل لوحده
الراجل عايش في سجن داخل القصر الجمهوري والسجانين هما رجال الحاشية اللي حواليه
الراجل ممنوع انه يعرف اي حقيقة عن البلد او عن الشعب (طبق الكشري بخمسين قرش)
الراجل طول الفيلم حزين ومكسور وحتي ضحكته فيها أسي وحزن
الراجل مايعرفش ان العيش اللي بناكله مليان زلط ومسامير وحبال كمان
الراجل مايعرفش ان الشرطة بتتعامل مع الشعب في اقسام البوليس بطريقة غير ادمية
الراجل مايعرفش ان البلدية والكهرباء وكل المحليات مليانة فساد
والله والله والله بحب الريس بتاعنا لكن عمري ما ارضي ابدا عن اي عمل فني يظهره قدامي
في صورة تستحق العطف والاسي وكأننا في دولة مستعمرة او مهزومة عسكريا
عجبني الفيلم جدا كعمل فني
عجبتني الكوميديا الراقية لطلعت زكريا علي غير العادة
خالد زكي اقنعني انه ينفع رئيس جمهورية (بغض النظر عن الاسي والحزن اللي كان فيها)


الأحد، ١٠ فبراير ٢٠٠٨

بدون تعليق












عملوها الوحوش


الله عليكم يا فراعنة

الله عليكم يا مصريين

احنا اسياد افريقيا

الف الف الف الف الف الف مبروك

الأحد، ٢٧ يناير ٢٠٠٨

انا ماشي

انا ماشي
ومش نادم
علي عمري اللي
عشته زمان
انا نادم
علي حبك
نادم ع الغربة
في الأوطان
انا ماشي ومش راجع
انا عاشق لكن ضايع
دموعي خدتني بالأحضان

رميت نفسي في ضلة نار

في ليلة حر

زرعت الصبر في الصبار

جنيت المر

دعيت ربي

يموت قلبي

وعمري يمر

لاقيت نفسي

واخد نفسي

في حزني بجر


انا ماشي
بجر حطام من الأحلام
بواقي قلب بيعاني
واخد قلبي
واخد ناري
ونار الصبر كوياني
انا ماشي ومش راجع
وهارجع ليه؟
وايه في حكايتي يستاهل
راح ابكي عليه
حطام قلبي سيبهالك
ومش نادم علي عمري
اللي عشته زمان
انا نادم علي حبك
نادم ع الغربة في الأوطان
انا ماشي

الأحد، ٣٠ ديسمبر ٢٠٠٧

الفرح بكرة2

يالله نسمي بسم الله الرحمن الرحيم ونكمل ما بدأناه في البوست قبل السابق واللي بيحمل نفس العنوان* وفي البوست اللي احنا فيه ده مش هنتكلم كتير لان الحكاية خلاص قولناها والان مع هذه الأغنية*
قولتيله بحبك ولا

قالك هو بحبك

وسكنتي قلبه ولا

هو اللي ساكن قلبك

*******************

سكن قلبك مكاني

خلاكي تحبي تاني

ونسيتي معاه زماني

وضاع قلبي اللي حبك

قولتيله بحبك ولا قالك هو بحبك



قالك انك حياته

وانك شمس النهار

وانك قمر الليالي

وانك جنة ونار

*******************

خلاكي تحسي بيه

وبعمرك تشتريه

وقلبي اللي احتلتيه

ازاي راح ينسي حبك

قولتيله بحبك ولا قالك هو بحبك

الأحد، ١٦ ديسمبر ٢٠٠٧

كل سنة وانتم طيبين


كل سنة وانتم طيبين والسنة اللي جاية كل مشاكلنا تتحل ان شاء الله

الثلاثاء، ١١ ديسمبر ٢٠٠٧

الفرح بكرة


الفرح بكرة

يوم1999/4/9اليوم ده عمره ماهيروح من ذاكرتي ابدالييييييييييييييييييييييييييييييييييييييه ؟

تعالوا مع بعض نعرف ليه

القصة بتبدأ لما انا خلصت مركز التدريب في الجيش ودي كانت مرحلة اصعب من الولادة في الشهر السابع . المهم اني كنت مترحل ومعايا الف عسكري مؤهلات عليا زي حالاتي, المهم انهم قالولنا اننا هنقعد علي محطة القطر حوالي سبع ساعات في انتظار القطر الحربي علشان نروح المعسكر اللي هنروح منه علي الوحدات الأساسيةاللي هنقضي فيها باقي فترة التجنيد. المهم اني قدرت بمعجزة اني اقولهم في البيت علي ميعاد وجودنا في المحطة. وفي الميعاد المظبوط جاني والدي رحمة الله عليه ومعاه اعز اصدقائي أحمد وفرحت بيهم فرحة جامدة جدا خاصة انهم جابولي معاهم فرخة مشوية اه والله العظيم مشوية.ما تستغربوش فرخة مشوية مع واحد بياكل اكل ميري بتعمل عمايل جامدة جدا.بعد ساعة استأذن والدي علشان كان تعبان وفي نفس الوقت علشان يسيبني انا واحمد نتكلم براحتنا.احمد كان في عينيه نظرة كانت مضايقاني جدا لأنه كان بيبصلي بحسرة وكأني خروف رايح يدبح بعد صلاة العيد.قعدت اهزر معاه وأقوله يابوحميد الجيش للجدعان وكلنا لها وانا الحمد لله مرتاح وخلاص الفترة الصعبة عدت ودة راسه والف جزمة قديمة مايضحك ابدا.المهم ياسادة يا كرام أخونا أحمد فضلت عقدت لسانه في حالة رفض تام انها تتفك لغاية ما سمعنا صوت القطر جاي من بعيد وهنا تكلمت شهرزاد قصدي تكلم احمد صديقي وقال كل اللي في نفسه ودار الحوار التالي.

انا/ايه يا ابو حميد وحد الله

/يأخذ نفس عميق قائلا لا اله الا الله

انا/مالك يا أحمد فيه ايه

هو/ مافيش حاجة انا كويس الحمد لله

انا/ يا احمد مافيش وقت القطر وصل وقدامنا عشر دقايق بالكتير وانت قلقتني

هو/اصل بصراحة

انا /يا عم قول خنقتني

هو/اصلي معزوم علي فرح بكرة

انا/وحياة امك كل دة عشان معزوم علي فرح

هو/ اصلي مش عارف اروح ولا لأ

انا/ ليه الحيرة دي عايز تروح روح مش عايز خلاص

هو/ اصل انت مش عارف دة فرح مين

انا/هايكون فرح مين يعني

هو/ فرح فلانة

ملحوظة هامة جدا***فلانة دي تبقي الانسانة اللي انا بحبها

انا/بجد

هو/اه والله

انا/متقمصا دور الفرسان**لازم تروح يا احمد لازم تقف جنبها

هو/انا كنت مستعد لليوم من زمان بس تكون انت العريس

انا/الحمد لله علي كل حال وماتنساش تقولها الف مبروك عن لساني

هو/ حاضر

يأتي القطر ونبدأ في الرحيل وأنا لا أري شيئا امامي وكل اللي داير في دماغي سؤال واحد( ياه بالسرعة دي) وركبت القطر وتوهت في الزحمة وجاني الوحي وكتبت اغنية قعدت طول فترة الجيش كل ما اقعد لوحدي اغنيها ويمكن لحد وقت قريب كنت بغنيها اما ايه هي الأغنية.اللي هيقرا البوست القادم ان شاء الله هايعرف